澳珠打通港深經脈高鐵直達
“澳車北上”預約難，名額有限，節假日爭崩頭都未必搶到，想話周末自駕過珠海飲個茶、去廣州行個街，難以話走就走。隨着粵港澳大灣區越來越深度融合，不論是澳門人，或香港人都流行趁假期坐高鐵上神州，由廣州玩到長沙，由桂林玩到重慶，朝早在澳門飲完茶，夜晚已經可以在重慶食麻辣火鍋。但係講到去深圳，陸路交通就有啲“唔就腳”。雖然有廣珠城際，但要去深圳、香港，仲要兜個大彎經廣州南站轉車，一兜就兩個幾鐘，時間白白浪費在路上。
經廣州南兜個大彎
港深、澳珠兩大極點之間，偏偏缺咗一條直連鐵路，正正係粵港澳大灣區交通網絡嘅“死穴”。為了打通呢條經脈，今年“兩會”期間，澳區全國人大代表團以代表團名義提出，要加快推動深珠（澳）高鐵建設，將之納入國家“十五五”鐵路規劃，讓澳門可以直接駁通國家高鐵網。
深珠（澳）高鐵如果建成，澳門去深圳嘅時間就會由兩個幾鐘縮短到四十分鐘左右，真正實現大灣區“一小時生活圈”。到時由橫琴出發，半個鐘就可以抵達前海，兩個合作區“孖住上”，資金、人才、技術雙向流動，路通財通，鐵路通咗，人流物流資金流自然滾滾來，產業多元之路相信也會更通暢。
- 發佈日期︰
- 2026-03-11
- 消息來源︰
- 澳門日報
